తాజాగా కొలికిపూడి శ్రీనివాసరావు చేసిన వ్యాఖ్యలు మరింత సంచలనం సృష్టించాయి. విజయవాడ ఎంపీ కేశినేని చిన్ని కేంద్రంగా ఒక 'మాఫియా' నడుస్తోందని ఆయన ఆరోపించారు. ఈ సందర్భంగా ఆయన సీనియర్ ఎన్టీఆర్ పాలనా విధానాలను గుర్తు చేసుకున్నారు. దివంగత ఎన్టీఆర్ ముఖ్యమంత్రిగా ఉన్నప్పుడు తిరువూరు మండల టీడీపీ అధ్యక్షుడిని ఎన్నుకోవడానికి కూడా పరిశీలకులను పంపేవారని, పార్టీలో ప్రజాస్వామ్య విలువలకు అంతటి ప్రాధాన్యత ఉండేదని ఆయన పేర్కొనడం గమనార్హం.
మరోవైపు, కొలికిపూడి శ్రీనివాసరావు ఇతర టీడీపీ నేతలపై చేస్తున్న ఆరోపణలు కూడా హాట్ టాపిక్‌గా మారాయి. పార్టీ పదవుల కోసం, నామినేటెడ్ పదవుల కోసం డబ్బులు తీసుకున్నారంటూ ఆయన చేసిన కామెంట్లు పార్టీ అంతర్గత వ్యవహారాలను బహిర్గతం చేశాయి. ఎంపీ కేశినేని చిన్ని పీఏ కిషోర్ తిరువూరు నియోజకవర్గంలో ఇసుక, రేషన్ మాఫియాను నడుపుతున్నారంటూ ఆయన చేసిన వ్యాఖ్యలు తీవ్ర కలకలం రేపాయి.
ఎమ్మెల్యే కొలికిపూడి చేస్తున్న ఈ వ్యాఖ్యలు ప్రజల్లో చర్చకు దారితీసినప్పటికీ, పార్టీ వర్గాల్లో మాత్రం భిన్నాభిప్రాయాలు వ్యక్తమవుతున్నాయి. కొందరు ఆయన ఆరోపణల్లో నిజం ఉందని భావిస్తూ, ఆయన చేస్తున్నది మంచి పనేనని సమర్థిస్తున్నారు. అయితే, మరికొందరు మాత్రం పార్టీలో అంతర్గతంగా పరిష్కరించుకోవాల్సిన అంశాలను బహిరంగంగా విమర్శించడం ద్వారా పార్టీ ప్రతిష్టకు, క్రమశిక్షణకు భంగం కలిగిస్తున్నారని అభిప్రాయపడుతున్నారు. పార్టీకి నష్టం కలిగే విధంగా ఆయన వ్యవహార శైలి ఉందనే వాదన బలంగా వినిపిస్తోంది.
ఈ నేపథ్యంలో, ఎమ్మెల్యే కొలికిపూడి శ్రీనివాసరావు విషయంలో తెలుగుదేశం పార్టీ అధిష్టానం ఎలాంటి నిర్ణయం తీసుకోబోతోంది అనే చర్చ జిల్లా రాజకీయాల్లో ప్రముఖంగా జరుగుతోంది. అంతర్గత సమస్యలను పరిష్కరించుకుని, పార్టీ ఐక్యతను కాపాడే దిశగా టీడీపీ ఎలాంటి చర్యలు తీసుకుంటుందో వేచి చూడాలి..
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి