అమెరికా 46వ అధ్యక్షుడిగా ఇటీవలే ప్రమాణస్వీకారం చేసిన జో బైడెన్.. పాలనలో తనదైన ముద్ర వేసేందుకు ప్రయత్నిస్తున్నారు. (NRI) ప్రవాస భారతీయులకు గొప్ప ఊరట కలిగించే నిర్ణయం తీసుకున్నారు. హెచ్‌-1బీ వీసాదారుల జీవిత భాగస్వాములకు భారీ ఊరట కల్పించారు. హెచ్‌4 వీసాదారుల పని అనుమతులు రద్దు చేసేలా మాజీ అధ్యక్షుడు డొనాల్డ్‌ ట్రంప్‌ తీసుకొచ్చిన నూతన వలస విధానాన్ని బైడెన్‌ రద్దు చేశారు. అయితే.. దీనిపై అధికారిక ప్రకటన వెలువడాల్సి ఉంది. హెచ్-‌1బీ వీసాదారుల జీవిత భాగస్వాముల (భార్యా లేదా భర్త)తో పాటు 21 ఏళ్ల లోపు పిల్లలకు.. అమెరికా పౌరసత్వం మరియు వలస సేవల సంస్థ (యూఎస్‌సీఐఎస్‌) హెచ్‌4 వీసాలు జారీ చేస్తుంది. అయితే.. మొదట్లో ఈ హెచ్‌-4 వీసాదారులకు అమెరికాలో ఉద్యోగాలు చేసుకునేందుకు వీలుండేది కాదు. హెచ్‌-4 వీసాదారులు చట్టపరంగా అమెరికాలో ఉద్యోగం చేసుకునేలా పని అనుమతి కల్పిస్తూ 2015లో నాటి అధ్యక్షుడు బరాక్ ఒబామా నిర్ణయం తీసుకున్నారు. అమెరికాలో నివాసం ఉంటున్న ఇతర దేశీయులకు ఈ నిర్ణయం ఎంతగానో మేలు చేసింది. అమెరికాలో నివసిస్తున్న విదేశీయుల్లో భారతీయులే అధికంగా ఉన్నారు. ఈ నిర్ణయంతో వారంతా లబ్ధి పొందారు. అయితే.. డొనాల్డ్‌ ట్రంప్‌ అధికారంలోకి రాగానే వలస విధానంలో కఠిన నిబంధనలు తీసుకొచ్చారు. హెచ్‌4 వీసాదారులకు పని అనుమతులు రద్దు చేయనున్నట్లు అమెరికా సుప్రీంకోర్టుకు తెలిపారు.



ట్రంప్‌ సర్కార్‌ తీసుకొచ్చిన నిబంధనల కారణంగా అమెరికాలో పలువురి భవితవ్యం అయోమయంలో పడింది. తమ సమస్య పరిష్కారానికి చర్యలు తీసుకోవాలని కోరుతూ అమెరికా చట్టసభ్యులు గతేడాది డిసెంబరులో జో బైడెన్‌ను కలిశారు. హెచ్‌4 వీసాలతో అమెరికాలో పని చేస్తున్న ఎంతో మంది విదేశీ మహిళలు వైద్య రంగంతో పాటు అనేక రంగాల్లో కీలక పాత్ర పోషిస్తున్నారని చట్టసభ్యులు వివరించారు. కరోనా సంక్షోభ పరిస్థితుల్లో వారి అవసరం ఎంతైనా ఉందని గుర్తుచేశారు. హెచ్‌4 వీసాలపై ట్రంప్‌ విధానాలను వెనక్కి తీసుకోవాలని కోరారు. హెచ్‌-1బీ వీసాదారుల భాగస్వాముల్లో ఎక్కువమంది నిపుణులైన భారతీయ మహిళలే ఉన్నారు. అధ్యక్ష ఎన్నికల ప్రచార సమయంలోనే పలువురు ప్రవాస భారతీయులు బైడెన్-కమలా హారిస్‌ను కలిసి తాము ఎదుర్కొంటున్న ఇబ్బందులను వివరించారు. ట్రంప్ సర్కార్ తీసుకొచ్చిన నిర్ణయాన్ని రద్దు చేస్తామని బైడెన్ అప్పుడే హామీ ఇచ్చారు. అధ్యక్షుడిగా బాధ్యతలు చేపట్టి సరిగ్గా వారం రోజులు గడుస్తున్న వేళ.. ఈ అంశంపై బైడెన్‌ కీలక నిర్ణయం తీసుకున్నారు.