ఇక రాబోయే కాలంలో ఈ సంస్థ ఇంకా వేగం పెంచబోతోంది. 2025–26 మధ్యలోనే ఆరు సినిమాలు లైనప్‌లో పెట్టారు. వీటిలో ఎక్కువ శాతం సుకుమార్ శిష్యులకే దక్కాయి. అయితే కేవలం తన దగ్గర శిష్యరికం చేసిన వాళ్లకే కాదు - కథ నచ్చితే, ప్రతిభ కనిపిస్తే ఎవరినైనా తన బ్యానర్‌లోకి తీసుకోవడానికి సుకుమార్ వెనుకాడడం లేదు. అందుకే సుకుమార్ రైటింగ్స్ ఇప్పుడు పెద్ద ప్రొడక్షన్ హౌజ్‌లతో కూడా టైఅప్ అవుతోంది. ప్రత్యేకంగా చెప్పుకోవాల్సిందంటే, నెట్‌ఫ్లిక్స్‌తో సుకుమార్ రైటింగ్స్ కలయికలో కొన్ని సినిమాలు రావడం. థియేటర్స్‌లో హిట్స్ కొట్టడమే కాదు, ఓటీటీలో కూడా తన బ్యానర్ పేరును బలంగా నిలిపే ప్లాన్‌లో ఉన్నారు సుకుమార్. దాంతో, కొత్త టాలెంట్‌కు అవకాశాలు ఇవ్వాలన్న ఆయన సంకల్పం మరింత విస్తృతమవుతుంది.
ఈ తరం దర్శకులలో ఇంత మంది శిష్యులు ఒకే వ్యక్తి నుంచి బయటకు వచ్చి విజయాలు సాధించడం అరుదైన విషయం. కానీ సుకుమార్ దగ్గర ఇది సాధ్యమైంది. తన శిష్యుల ప్రాజెక్టులు కూడా హిట్ అవ్వాలని ఆయన వెనక నుంచి అండగా నిలబడుతున్నారు. ఒకవైపు రామ్ చరణ్‌తో కొత్త కథ సిద్ధం చేస్తూనే, మరోవైపు శిష్యుల సినిమాలకు సహకారం అందిస్తూ బిజీగా ఉన్నారు. పదేళ్ల సుకుమార్ రైటింగ్స్ అనేది కేవలం ఒక ప్రొడక్షన్ హౌజ్‌ కథ కాదు. అది ఒక పాఠశాల కథ. టాలెంట్ ఉన్న వాళ్లను వెలుగులోకి తీసుకువచ్చిన వేదిక. రాబోయే ఐదు సంవత్సరాల్లో ఈ బ్యానర్ నుంచి వచ్చే సినిమాలు పరిశ్రమకు కొత్త గాలి పోసేలా ఉంటాయని సినీ వర్గాల టాక్.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి