సాధారణంగా బాలకృష్ణ హిందూపురం అభివృద్ధి, ప్రజల సమస్యల పరిష్కారమే తనకు ముఖ్యమని ఎప్పుడూ చెబుతుంటారు. ఈసారి కూడా కార్యకర్తలు మంత్రి పదవి కోసం నినాదాలు చేసినప్పటికీ, బాలకృష్ణ చాలా సున్నితంగా స్పందించారు. “ఇప్పటికే నియోజకవర్గ అభివృద్ధి బాగుంది కదా, ఇంకేం కావాలి?” అంటూ ప్రశాంతంగా సమాధానమిచ్చారు. అయితే ఈ డిమాండ్ వెనుక ఎవరు ఉన్నారు? ఎవరైనా నేతలు లేదా అభిమాన సంఘాలు ఈ అంశాన్ని ముందుకు తెచ్చారా? అనే ప్రశ్నలు ఇప్పుడు టీడీపీ వర్గాల్లో వినిపిస్తున్నాయి. రాజకీయ విశ్లేషకుల అభిప్రాయం ప్రకారం, ఈ డిమాండ్ స్వతంత్రంగా రాలేదని, బాలకృష్ణకు పార్టీ లోపల మరింత ప్రాధాన్యం రావాలన్న ఆకాంక్షతో కొందరు నేతలు దీనిని ప్రోత్సహిస్తున్నారని భావిస్తున్నారు.
మరోవైపు బాలకృష్ణ వ్యక్తిగతంగా మంత్రి పదవిపై పెద్దగా ఆసక్తి చూపే వ్యక్తి కాదు. ఆయనకు సినిమాలపైనే ఎక్కువ ఆసక్తి ఉంది. ప్రస్తుతం కూడా బాలకృష్ణ సినిమాలతో బిజీగా ఉన్నారు. ఆయన కెరీర్ దశాబ్దాలుగా కొనసాగుతుండటం, అభిమానుల్లో ఇప్పటికీ క్రేజ్ తగ్గకపోవడం ఇందుకు నిదర్శనం. నారా లోకేష్ ఇప్పటికే మంత్రిగా ఉన్నారు. విశాఖ ఎంపీగా మరో అల్లుడు గజపతిరాజు ఉన్నారు. ఈ నేపథ్యంలో కుటుంబం నుంచి మరొకరికి మంత్రి పదవి ఇవ్వడం రాజకీయంగా ఎలా ఉంటుందనే చర్చ కూడా ఉంది. అయినా పార్టీ అధిష్ఠానం అవకాశం ఇస్తే బాలకృష్ణ తిరస్కరించరని ఆయన అనుచరులు అంటున్నారు. మొత్తం మీద, హిందూపురం కార్యకర్తల ఈ కొత్త డిమాండ్ టీడీపీ అంతర్గత రాజకీయాల్లో ఉత్సుకతను రేపింది. బాలకృష్ణ భవిష్యత్తులో మంత్రి అవుతారా? లేదా ఆయన సాధారణ ప్రజా సేవకుడిగానే కొనసాగుతారా? అనేది కాల‌మే నిర్ణ‌యించాలి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి