ఏపీలో అధికారంలోకి వచ్చేదెవరు.. ఇప్పుడు తెలుగు రాష్ట్రాల్లో అందరూ ఆసక్తిగా ఎదురుచూస్తున్న విషయం ఇది. పోటాపోటీ పరిస్థతి ఉన్నందువల్ల అందరిలోనూ టెన్షన్ రేపుతోంది. అందుకే ఏ సర్వే వచ్చినా అందరూ వాటివైపు ఆసక్తిగా చూస్తున్నారు.
ఇలాంటి సమయంలో ఓ సర్వే తెలుగుదేశం శ్రేణుల్లో కలకలం రేపుతోందట. అది కూడా సర్వేల స్పెషలిస్ట్ అస్మదీయ నేతల కోసం చేసిన ఇంటర్నల్ సర్వే అని చెబుతున్నారు. ఇంతకీ ఆ సర్వేలో ఏం చెప్పారంటారా.. గ్రామీణ ప్రాంతాల్లో మెజారిటీ ఓటర్లు వైసీపీవైపే ఉన్నారట.
టీడీపీ- వైసీపీ మధ్య లెక్కల్లో తేడా చాలా విస్పష్టంగా కన్పిస్తోందట. ఇదే ట్రెండ్ కొనసాగితే మాత్రం ఫలితాలు అధికార పార్టీకి చేదు అనుభవాన్ని మిగల్చటం ఖాయం అని ఆ సర్వే కుండబద్దలు కొట్టిందట. గ్రామీణ ప్రాంతాలతో పాటు పట్టణ ప్రాంతాల్లోనూ చాలా చోట్ల ప్రతిపక్ష వైసీపీకి అనుకూల వాతావరణం ఉందని తేలిందట.
గెలుపు అవకాశాలపై అనుమానంతోనే చంద్రబాబు ఎన్నికల ముందు పెన్షన్ పెంపు, అన్నదాత సుఖీభవ, డ్వాక్రా మహిళలకు పసుపు-కుంకుమ వంటి స్కీమ్ లను ఆగమేఘాల మీద అమలుపర్చారు. అయినా సరే వాతావరణం ఏ మాత్రం అనుకూలంగా మారకపోవటం టీడీపీ నేతల్లో చర్చనీయాంశంగా మారింది. అందుకే వారిలో ఒకటే టెన్షన్ కనిపిస్తోందట.
