ఒంటరిగా జల్సా చేద్దామని దుబాయ్ ఫ్లైట్ ఎక్కితే, మీ జేబుకు నెలనెలా చిల్లు పడటం ఖాయం. ఆకాశహర్మ్యాల మధ్య ఒక చిన్న వన్ బీహెచ్‌కే ఫ్లాట్‌లో తలదాచుకోవాలన్నా, ప్రయాణానికి ఓ కారు మెయింటెయిన్ చేయాలన్నా అయ్యే ఖర్చు తెలిస్తే దిమ్మతిరిగిపోతుంది. మన భారత కరెన్సీలో చెప్పాలంటే, నెలకు సుమారుగా రూ.2.81 లక్షలు ఆవిరైపోతాయి. ఇది కేవలం బేసిక్ లైఫ్ స్టైల్ కోసం మాత్రమే.
సతీసమేతంగా షాపింగ్ మాల్స్‌లో షికార్లు చేయాలనుకునే జంటలకైతే ఖర్చుల మీటర్ ఇంకా స్పీడ్‌గా తిరుగుతుంది. ఇద్దరు కలిసి ఒకే వన్ బీహెచ్‌కేలో ఉన్నప్పటికీ, నెలవారీ నిర్వహణ ఖర్చులు తడిసి మోపెడవుతాయి. మీ నెల జీతం అకౌంట్‌లో పడగానే దాదాపు 3.94 లక్షల రూపాయలు అలా మాయమైపోతాయి. భార్యతో కలిసి దుబాయ్ లైఫ్‌ను ఎంజాయ్ చేయాలనే ఆలోచనకు కళ్లెం వేసే లెక్క ఇది.
ఇక పిల్లల భవిష్యత్ కోసం ఫ్యామిలీతో సహా దుబాయ్ వెళ్లాలనుకునే వారి పరిస్థితి మరింత సంక్లిష్టం. ఇద్దరు పిల్లలు, భార్యాభర్తలు కలిసి ఉండాలంటే అయ్యే ఖర్చు ఊహకు అందదు. పిల్లల నాణ్యమైన చదువు, కారు తప్పనిసరి అవసరం, కనీస వసతులతో కూడిన వన్ బీహెచ్‌కే ఇల్లు... వీటన్నింటికీ కలిపి నెలకు మీ బ్యాంకు ఖాతా నుంచి కనీసం రూ.4.97 లక్షలు ఖాళీ అవ్వాల్సిందే. అంటే ఏడాదికి అక్షరాలా 60 లక్షల రూపాయలు కేవలం జీవించడానికి మాత్రమే కావాలి.
ఈ లక్షల ఖర్చు కేవలం అద్దె, కారు, స్కూల్ ఫీజులు మాత్రమే కాదు. మీ రోజువారీ భోజనం, వీకెండ్ వినోదాలు, పబ్లిక్ ట్రాన్స్‌పోర్ట్ పాసులు, అప్పుడప్పుడు కొనే బట్టలు, ఇతరత్రా చిన్న చిన్న కొనుగోళ్లు అన్నీ కలిపితేనే ఈ లెక్క తేలుతోంది. అంటే రూపాయి రూపాయి కూడబెట్టుకుందామన్నా అక్కడ సాధ్యమయ్యే పని కాదని నిపుణులు హెచ్చరిస్తున్నారు.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి