గ్రేటర్లోని 29 అసెంబ్లీ స్థానాలకు గానూ కాంగ్రెస్ కేవలం మూడింటిని మాత్రమే గెలుచుకుంది. ఈ నేపథ్యంలో స్థానిక సంస్థల ప్రజాప్రతినిధులు, ఎమ్మెల్యేల బలం అవసరమని, లేకుంటే లోక్ సభ ఎన్నికల్లో గెలవడం కష్టమని కాంగ్రెస్ పార్టీ అభిప్రాయపడింది. ఇందుకోసం ఇతర పార్టీల ఎమ్మెల్యేలతో మాట్లాడే బాధ్యతను కొందరు సీనియర్ నేతలకు అప్పగించారు. ఎమ్మెల్యేలతో మాట్లాడిన అనంతరం సీఎం రేవంత్ రెడ్డితో కూడా ఫోన్ లో మాట్లాడుతున్నారు. నగరానికి చెందిన ఐదుగురు ఎమ్మెల్యేలు కాంగ్రెస్లో చేరేందుకు సుముఖత వ్యక్తం చేయడంతో వారు ఎన్నికలకు ముందే చేరే అవకాశం ఉన్నట్లు తెలుస్తోంది. కాంగ్రెస్ అగ్రనేతలు మరో పది మంది ఎమ్మెల్యేలతో కూడా మాట్లాడారని సమాచారం.
BRS కార్పొరేటర్లను కూడా కాంగ్రెస్ పార్టీ నేతలు తమ పార్టీలో చేరమని ప్రచారం చేస్తున్నట్టు తెలుస్తోంది. బల్దియా పరిధిలోని కార్పొరేటర్లను కూడా దారిలోకి తెచ్చేందుకు ఏర్పాట్లు చేస్తున్నారు. ఎన్నికలకు ముందు దాదాపు 30 మందిని చేర్చుకోవాలని కాంగ్రెస్ లక్ష్యంగా పెట్టుకుంది. ఎన్నికల ముందు ఈ లక్ష్యం పూర్తి కాకపోయినా.. ఎమ్మెల్యేల తరహాలో కార్పొరేటర్లతో అంతర్గత ఒప్పందం చేసుకుని కాంగ్రెస్ అభ్యర్థులు గెలుపొందాలని భావిస్తున్నారు. 10 మంది కార్పొరేటర్లతో మాట్లాడిన తర్వాత వారందరూ సుముఖత వ్యక్తం చేశారని కాంగ్రెస్ సీనియర్ నేత ఒకరు తెలిపారు. మున్సిపల్ సంఘాలు, మున్సిపల్ సంస్థల్లోని ప్రజాప్రతినిధుల విషయంలోనూ కాంగ్రెస్ నేతలు ఇదే ధోరణి అవలంబిస్తున్నారు.