సంక్రాంతి పండగ హడావిడి ముగియడంతో పార్టీ పదవుల నియామకాలపై కసరత్తు మొదలు పెట్టినట్టు ప్రచారం జోరుగా జరుగుతోంది. పార్టీ పదవుల కొలువుల ప్రచారం తెరమీదకు రావడంతో ఏ గ్రామంలో ఎవరికి పదవులు వరిస్తాయి అన్న విషయంపై ఊహాగానాలు మొదలైపోయాయి. మైలవరం నియోజకవర్గ పదవుల ఎంపిక ఒక ఎత్తు అయితే కొండపల్లి మున్సిపాలిటీ, ఇబ్రహీంపట్నం మండల పదవుల ఎంపిక విషయంపై మాత్రం తీవ్ర స్థాయిలో చర్చ నడుస్తోంది. ముఖ్యంగా రాష్ట్ర రాజధానికి అత్యంత సమీపంగా ఉండే ఇబ్రహీంపట్నం మండల కన్వీనర్, కొండపల్లి మునిసిపాలిటి పరిధిలోని అధ్యక్ష పదవుల కోసం పోటీ తీవ్రంగా ఉంది. వీటి కోసం ఇప్పటికే జగన్ స్థాయిలో కూడా పైరవీలు చేసేందుకు నేతలు సిద్ధమవుతున్నారు. మైలవరం నియోజకవర్గంలో అత్యంత కీలకపాత్ర పోషించే మండలం ఇబ్రహీంపట్నం. ఈ నేపథ్యంలో పార్టీ కన్వీనర్ ఎంపిక కత్తి మీద సామే అని చెప్పాలి. పార్టీ ప్రారంభం నుంచి వైసీపీలో ఉంటూ... అన్ని కార్యక్రమాల్లో విస్తృతంగా పాల్గొన్న నేతల పేర్లు ముందు వరుసలో ఉన్నాయి. అదే సమయంలో స్థానిక సంస్థల ఎన్నికల్లో పార్టీ అభ్యర్థుల గెలుపు కోసం తీవ్రంగా శ్రమించిన వ్యక్తులకే పదవులు కేటాయించాలని కూడా ఎమ్మెల్యే వసంత కృష్ణ ప్రసాద్ భావిస్తున్నారు.
