భారతదేశాన్ని అహర్నిశలూ కంటికి రెప్పలా కాపాడుతున్న సైన్యంపై కంటికి కనిపించని మహమ్మారి పగబట్టింది. ఉగ్రమూకల్ని చీల్చిచెండాడే మన సైనికులు ఆ వైరస్ భారిన పడి ఆస్పత్రిపాలవుతున్నారు. అందుకు నిదర్శనం ఢిల్లీలోని సీఆర్ పీఎఫ్ బెటాలియన్ లో 122మందికి పైగా జవాన్లకు కరోనా వైరస్ సోకడమే. ఆ సైనికులను మండోలిలోని గవర్నమెంట్ ఆస్పత్రికి తరలించి ట్రీట్ మెంట్ ఇస్తున్నారు.
దేశరాజధానిలోని మయూర్ విహార్ లో ఇటీవల కరోనా మహమ్మారి తన ప్రతాపాన్ని చూపిస్తోంది. కేవలం ఈ ప్రాంతంలోనే 52మందికి పైగా ఈ మహమ్మరి సోకింది. దీంతో అలర్టయిన అధికారులు.. కరోనా వైరస్ అంతం చూసేందుకు సిద్ధమయ్యారు. వైరస్ నిర్ధారణ పరీక్షలను వేగవంతం చేశారు. వైరస్ లక్షణాలున్న బాధితులను ఐసోలేషన్ వార్డుకు తరలించి చికిత్స అందిస్తున్నారు.
ఈ సీఆర్ పీఎఫ్ బెటాలియన్ లో దాదాపు 11వందల మంది జవాన్లు ఉన్నారు. వీరిలో 122 మందికి పైగా వైరస్ అటాక్ అయింది. దీంతో అధికారుల్లో ఆందోళన నెలకొంది. ఈ జవాన్లతో సన్నిహితంగా మెలిగిన వారందరినీ క్వారంటైన్ కు తరలించి కరోనా నిర్ధారణ పరీక్షలు నిర్వహించారు. ఏప్రిల్ మొదటి వారంలో 55ఏళ్లర వయసున్న ఓ ఎస్ ఐ కరోనా వైరస్ దెబ్బకు ప్రాణాలు కోల్పోయారు. ఆ సమయంలో సెలవుపై ఇంటికి వెళ్లొచ్చిన కానిస్టేబుల్ నుంచి సైతం మిగతా సిబ్బందికి వైరస్ అటాక్ అయి ఉంటుందని అధికారులు భావిస్తున్నారు.
ఒక్క బెటాలియన్ నుంచి వందకు పైగా కేసులు నమోదుకావడంతో.. కేంద్ర ప్రభుత్వం ఆందోళన వ్యక్తం చేస్తోంది. ఈ ఘటనపై సీఆర్ పీఎఫ్ నుంచి హోం శాఖ వివరణ కూడా కోరింది. కరోనా ప్రభావంతో సీఆర్ పీఎప్ పగడ్బంధీ చర్యలు చేపట్టింది. అన్ని బెటాలియన్లలో పగడ్బంధీగా శానిటైజేషన్ చేస్తోంది. అంతేకాదు వాహనాల శుభ్రత విషయంలో తగు జాగ్రత్తలు తీసుకుంటోంది.
