ముఖ్యంగా భారతదేశంలో గూగుల్ తీసుకున్న చర్యలు రికార్డు స్థాయిలో ఉన్నాయి. ఈ గడ్డపై ఏకంగా 247 మిలియన్లకు పైగా ప్రకటనలను తొలగించిన గూగుల్, దాదాపు 2.9 మిలియన్ల అడ్వర్టైజర్ల ఖాతాలను నిలిపివేసింది. ఆన్‌లైన్ యాడ్స్ నియంత్రణ విషయంలో భారత మార్కెట్‌లో ఇంత భారీ స్థాయిలో చర్యలు తీసుకోవడం ఇదే తొలిసారి.
ప్రపంచవ్యాప్తంగా ఈ సంఖ్యలు మరింత దిగ్భ్రాంతికరంగా ఉన్నాయి. గ్లోబల్‌గా దాదాపు 39.2 మిలియన్లకు పైగా అడ్వర్టైజర్ల ఖాతాలను సస్పెండ్ చేసిన గూగుల్, ఏకంగా 5.11 బిలియన్లకు పైగా అభ్యంతరకర ప్రకటనలను తమ ప్లాట్‌ఫామ్స్ నుంచి ఊడ్చిపారేసింది. తమ తాజా వార్షిక యాడ్ సేఫ్టీ రిపోర్ట్‌లో కంపెనీ ఈ వివరాలను వెల్లడించింది.
మరి గూగుల్ ఎందుకు ఈ కొరడా ఝుళిపించింది అన్న వివరాల్లోకి వెళ్తే... తమ ప్రకటనల విధానాలను ఉల్లంఘించిన యాడ్స్‌పైనే ఈ చర్య తీసుకున్నట్లు స్పష్టమవుతోంది. ఈ జాబితాలో ఆర్థిక సేవలకు సంబంధించిన ప్రకటనలే ముందు వరుసలో ఉన్నాయని, అవి నిబంధనలను తీవ్రంగా ఉల్లంఘించాయని గూగుల్ పేర్కొంది. ఆ తర్వాత ట్రేడ్మార్క్ ఉల్లంఘనలు, యాడ్స్ దుర్వినియోగం, జూదం (గంబ్లింగ్) గేమ్స్‌కు సంబంధించిన ప్రకటనలు ఉన్నాయని ఆ నివేదికలో వివరించింది.
ఈ భారీ ప్రక్షాళన ద్వారా గూగుల్ తమ వినియోగదారులకు సురక్షితమైన, నమ్మకమైన ఆన్‌లైన్ అనుభవాన్ని అందించాలనే తమ నిబద్ధతను మరోసారి చాటుకుంది. మోసపూరిత ప్రకటనలతో ప్రజలను తప్పుదోవ పట్టించే ప్రయత్నాలకు తమ ప్లాట్‌ఫామ్స్‌లో చోటు లేదని గూగుల్ ఈ సంచలన నిర్ణయం ద్వారా గట్టి సందేశం పంపినట్లయింది. డిజిటల్ యాడ్స్ రంగంలో ఇది ఖచ్చితంగా ఓ కీలక మలుపు అనే చెప్పాలి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి