ఏ మనిషైనా ఆనందంగా ఉండాలంటే ఆ వ్యక్తి మనశ్శాంతి, సంతృప్తిని కలిగి ఉండాలి. ఈ రెండూ ఉన్నవాళ్లు ఏ పనిలోనైనా సులభంగా సాధిస్తారు. ఈ రెండు లక్షణాలు ఉన్నవారు అదృష్టవంతులు అని కూడా చెప్పవచ్చు. మన దగ్గర ఎంత ధనం ఉన్నా ఈ రెండు లేకపోతే మాత్రం వ్యర్థమే. చాలామంది అనవసరమైన విషయాల గురించి అతిగా ఆలోచించి ఇబ్బందులు పడుతూ ఉంటారు. నిజానికి ఆలోచించడం గొప్ప వరం.
కానీ కొంతమంది మాత్రం వారి ఆలోచనల వల్ల ఇబ్బందులు పడుతూ ఉంటారు. ఎందుకంటే వారు ప్రతి చిన్న సమస్యను చాలా పెద్దదిగా ఊహించుకుని సమస్య రాకముందే ఆందోళన పడుతూ ఉంటారు. మన మనసులోని ఆలోచనలను ఎల్లప్పుడూ లక్ష్యం వైపు, మనకు మేలు చేసే ఆలోచనల వైపు మాత్రమే మళ్లించాలి. మరికొందరు జీవితంలో ఎంత సాధించినా సంతృప్తి ఉండదు. సాధించిన దాని కంటే ఎక్కువ సాధించాలనుకోవడం కరెక్ట్ అయినా సాధించిన విజయంపై సంతృప్తి లేకపోతే వ్యర్థమే.
కొన్ని జాగ్రత్తలు పాటించడం ద్వారా మనశ్శాంతి, సంతృప్తిని పొందటంతో పాటు విజయం సాధించవచ్చు. ఎవరైనా అనవసరమైన విషయాల గురించి ఎక్కువగా ఆలోచిస్తుంటే వారు ప్రతిరోజూ కొన్ని నిమిషాలు ప్రశాంతమైన వాతావరణంలో కూర్చుని ఆలోచించాలి. ఆలోచనలను పరిశీలించడం మొదలుపెట్టాలి. ఎటువంటి ఆలోచనలు ఎక్కువగా ఇబ్బంది పెడుతున్నాయో గుర్తించి ఆ ఆలోచనలను మూలం ఏంటో ఆలోచించాలి.
మీరు గుర్తించిన ఇబ్బందులు పెట్టే ఆలోచనలను పేపర్ పై రాసుకుని ఆ పరిస్థితిని మార్చేందుకు ప్రయత్నాలు చేయాలి. ఒకవేళ ఆ పరిస్థితిని మార్చడం సాధ్యం కాని పక్షంలో ఆ పరిస్థితిని అంగీకరించాలి. అలా పరిస్థితులను అంగీకరించడం ద్వారా ప్రశాంతత పొందడం సాధ్యమవుతుంది. మనం ఎల్లప్పుడూ లక్ష్యం గురించి ఎక్కువగా ఆలోచించాలి. ఎప్పుడైతే లక్ష్యం గురించి ఎక్కువగా ఆలోచిస్తామో అప్పుడే విజయం సొంతమవుతుంది.
