ఇటీవల తెలుగు రాష్ట్రాల్లో బీజేపీ రాష్ట్ర అధ్యక్షుల నియామకం ఈ ప్రక్షాళనలో కీలక ఘట్టం. ఆంధ్రప్రదేశ్‌లో ఊహించని విధంగా దగ్గుబాటి పురందేశ్వరి స్థానంలో మాజీ ఎమ్మెల్సీ పీవీఎన్ మాధవ్‌కు పార్టీ పగ్గాలు అప్పగించారు. అటు తెలంగాణలోనూ బండి సంజయ్ స్థానంలో మాజీ ఎమ్మెల్సీ, న్యాయవాది ఎన్. రామచందర్ రావును నూతన అధ్యక్షుడిగా నియమించారు. ఈ మార్పులు కేవలం రెండు రాష్ట్రాలకే పరిమితం కాలేదు. దేశవ్యాప్తంగా పలు రాష్ట్రాల్లో బీజేపీ అధ్యక్షులను మారుస్తూ అధిష్ఠానం తనదైన మార్క్ చూపిస్తోంది. రాబోయే ఎన్నికల్లో అనుసరించాల్సిన వ్యూహాలకు అనుగుణంగా, యువతకు, కొత్త ముఖాలకు అవకాశం కల్పిస్తూ ఈ మార్పులు చేపడుతున్నట్లు స్పష్టమవుతోంది.
రాష్ట్రాల్లో మార్పుల పర్వం ముగింపు దశకు చేరుకోవడంతో ఇప్పుడు అందరి దృష్టి బీజేపీ జాతీయ అధ్యక్ష పీఠంపై పడింది. ప్రస్తుత అధ్యక్షుడు జేపీ నడ్డా పదవీకాలం ముగియనుండటంతో కొత్త సారథి ఎవరనే దానిపై తీవ్ర ఉత్కంఠ నెలకొంది. ఈ పదవి కోసం పలువురు సీనియర్ నేతల పేర్లు ప్రముఖంగా వినిపిస్తున్నాయి. అయితే, ప్రధాని మోదీ, అమిత్ షాల మదిలో ఏముందోనన్నది అంతుచిక్కడం లేదు. పార్టీని రాబోయే దశాబ్దకాలం పాటు నడిపించగల సమర్థుడైన, బలమైన నేత కోసం ఆరెస్సెస్ కూడా తన వంతు కసరత్తు చేస్తున్నట్లు సమాచారం. ఈ నేపథ్యంలో జాతీయ అధ్యక్షుడి ఎంపిక ఆసక్తికరంగా మారింది.
కేవలం పార్టీ పదవులే కాదు, ప్రభుత్వంలోని కీలక నామినేటెడ్ పోస్టుల భర్తీపైనా కేంద్రం దృష్టి సారించింది. ఇటీవల రాష్ట్రపతి ద్రౌపది ముర్ము వివిధ రంగాలకు చెందిన నలుగురు ప్రముఖులను రాజ్యసభకు నామినేట్ చేశారు. అలాగే, గోవా, హర్యానా, లడఖ్ వంటి ప్రాంతాలకు కొత్త గవర్నర్లను నియమించారు. ఈ నియామకాలన్నీ కూడా పక్కా రాజకీయ, సామాజిక సమీకరణాలను దృష్టిలో ఉంచుకుని చేసినవేనని విశ్లేషకులు భావిస్తున్నారు.
ఈ ప్రక్షాళన ప్రక్రియలో అత్యంత కీలకమైన అంకం మోదీ మంత్రివర్గ విస్తరణ. త్వరలోనే కేబినెట్‌లో మార్పులు చేర్పులు ఉండబోతున్నాయని, కొందరికి ఉద్వాసన పలికి, కొత్తవారికి అవకాశం కల్పించనున్నారని ప్రచారం జోరుగా సాగుతోంది. ముఖ్యంగా, రాబోయే ఎన్నికలను దృష్టిలో ఉంచుకుని, మిత్రపక్షాలకు పెద్దపీట వేయడంతో పాటు, ప్రాంతీయ సమతుల్యతను పాటించేలా ఈ విస్తరణ ఉండబోతోందని తెలుస్తోంది. ఈ విస్తరణలో ఎవరికి చోటు దక్కుతుంది, ఎవరు పదవులు కోల్పోతారనేది ఇప్పుడు బీజేపీ వర్గాల్లో హాట్ టాపిక్‌గా మారింది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి