ప్రస్తుతం మరోసారి ఈ డిమాండ్ బలంగా వినిపిస్తోంది. దీని వెనుక ముఖ్య కారణం చంద్రబాబు వ్యూహమే. ఆయనకు ఎన్టీఆర్ రాజకీయ వారసత్వం అంటే ప్రత్యేకమైన ప్రాధాన్యం. బీసీలు, కమ్మవర్గం, అలాగే పేదలు, బలహీన వర్గాల్లో ఎన్టీఆర్ ప్రభావం ఇప్పటికీ గట్టిగానే ఉంది. కాబట్టి ఆయనకు భారతరత్న లభిస్తే, టిడిపి ఓటు బ్యాంకు మరింత బలపడుతుందని చంద్రబాబు లెక్కలు వేసుకున్నారని విశ్లేషకులు చెబుతున్నారు. ఈ వ్యూహం అమలులోకి రావడంలో పెద్ద అడ్డంకి ఒకటుంది. కేంద్ర ప్రభుత్వం నిబంధనల ప్రకారం భారతరత్న స్వీకరించేది మొదట జీవిత భాగస్వామి. ఈ క్రమంలో ఎన్టీఆర్ భార్య లక్ష్మీపార్వతికే ఆ గౌరవం దక్కుతుంది. ఇదే టిడిపి, నందమూరి కుటుంబానికి రాజకీయంగా ఇబ్బందికర పరిస్థితి. ఎందుకంటే లక్ష్మీపార్వతి ప్రస్తుతం వైసీపీ వైపు నుంచి చురుకుగా వ్యవహరిస్తూ, తరచూ చంద్రబాబుపై విమర్శలు చేస్తున్నారు. ఇలాంటి పరిస్థితుల్లో ఆమెకు జాతీయ స్థాయిలో గుర్తింపు రావడం టిడిపికి రాజకీయంగా ప్రతికూలంగా మారవచ్చు.
ఇక లక్ష్మీపార్వతి స్వయంగా ప్రకటించిన ప్రకారం, అవార్డు అందుకోవడంలో నందమూరి కుటుంబ సభ్యులెవరైనా ముందుకు వస్తే తనకు అభ్యంతరం లేదని, కానీ కార్యక్రమంలో తనకూ ఆహ్వానం రావాలని మాత్రమే కోరుకుంటున్నారు. ఇది కూడా రాజకీయంగా టిడిపిని సంక్లిష్ట పరిస్థితుల్లోకి నెట్టే అంశమే. ఎందుకంటే ఆమెను విస్మరించడం సాధ్యం కాదు. టిడిపి–బీజేపీ మధ్య స్నేహపూర్వక సంబంధాలున్న ఈ సమయంలో, చంద్రబాబు కోరితే ప్రధాని నరేంద్ర మోడీ ఈ నిర్ణయం తీసుకోవడంలో వెనుకాడరని అంటున్నారు. కానీ లక్ష్మీపార్వతి అంశాన్ని ఎలా హ్యాండిల్ చేస్తారన్నది టిడిపి వ్యూహానికి కీలకం అవుతుంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి