ఈ మహమ్మారి నుంచి ఎప్పుడు బయట పడతాం.. స్వేచ్ఛగా ఎప్పుడు తిరుగుతామో తెలియని పరిస్థితి నెలకొంది. బయట, ఇంట్లో రక్షణ లేకుండా పోతుంది. వైరస్ ఒకరికి సోకినా.. ఇంటిల్లిపాది అంటుకుంటోంది. వైరస్ శరవేగంగా వ్యాప్తి చెందుతుండటంతో ప్రజలు ఆందోళనకు గురవుతున్నారు. అ నేపథ్యంలో ఐసీఎంఆర్ ఎపిడెమాలజీ చీఫ్ డాక్టర్ సమీరన్ పాండా ఒక శుభవార్తను అందించారు. కరోనా వైరస్ ఎప్పుడు అంతం అవుతుందనే విషయాన్ని డాక్టర్ సమీరన్ స్పష్టతను ఇచ్చారు. ఈ ఏడాది మార్చి 11 తేదీ నాటికి కరోనాకు శుభం కార్డు పడుతుందని ఆయన పేర్కొన్నారు.
ఈ సందర్భంగా డాక్టర్ సమీరన్ మాట్లాడుతూ.. ‘‘ప్రస్తుతం దేశ ప్రజలంతా మాస్తులు ధరిస్తున్నారని, భౌతిక దూరం పాటిస్తున్నారు. ఇదే తరహాలో ప్రజలు కొనసాగిస్తే.. కరోనాను త్వరలోనే ఖతం చేయొచ్చు. మళ్లీ కరోనా కొత్త వేరియంట్లు పుట్టకపోతే ఈ ఏడాది మార్చి 11వ తేదీ నాటికి కరోనాకు శుభంకార్డు పెట్టొచ్చు. ఆ తర్వాత అది కూడా సాధారణ జలుబుగా మారుతుంది.’’ అని డాక్టర్ సమీరన్ తెలిపారు.
అయితే వీరి ప్రకారం ఒమిక్రాన్ కేవలం 3 నెలల పాటే ప్రభావం చూపుతుందని అన్నారు. డిసెంబర్ 11వ తేదీన ఇండియాలో ఒమిక్రాన్ కేసులు నమోదు అయ్యాయని.. మార్చి 11వ తేదీ నాటికి ఒమిక్రాన్ కథ కూడా ముగుస్తుందని పేర్కొన్నారు. ప్రస్తుతం కరోనా తీవ్రత అన్ని రాష్ట్రాల్లో ఒకే విధంగా లేదని తెలిపారు. ప్రజలు మరిన్నీ జాగ్రత్తలు పాటించాలని ఆయన సూచించారు. అప్పుడే కరోనాను పూర్తి స్థాయిలో నిర్మూలించగలమన్నారు.