ఈ నేపథ్యంలో ఆంధ్రప్రదేశ్ ముఖ్యమంత్రి జగన్ మోహన్‌రెడ్డి గారు కూడా ఈ విషయంలో ముందస్తు జాగ్రత్తలను ఎంతో పకడ్బందీగా నిర్వహిస్తున్నారు. రాష్ట్రంలోని పిల్లల ఆసుపత్రుల్లో వైద్య సదుపాయాలను, ఔషధాలను, ఆక్సిజన్, ఐసీయూలు, వైద్యులు ఇలా అన్ని విధాలుగా సన్నద్ధం అయ్యారు. ఈ క్రమంలోనే చిన్నపిల్లలకు కరోనా సోకితే వారికి తల్లుల అవసరం ఎక్కువగా ఉంటుందని ఆలోచించిన సర్కార్ 5 ఏళ్లలోపు వయసు పిల్లలున్న తల్లులకు వయో పరిమితి లేకుండా టీకాలు వేయాలని నిర్ణయించుకుంది. ఈ క్రమంలో రాష్ట్రమంతా సర్వేను నిర్వహించి, 5 ఏళ్లలోపు పిల్లలు ఉన్న తల్లుల సంఖ్యను తెలుసుకుంది. సర్వే పూర్తయిన వెంటనే తల్లులకు టీకాలు వేసేవిధంగా కేంద్రాలను ఏర్పాటు చేసి తల్లులకు టీకాలు అందిస్తున్నారు.అయితే ప్రస్తుతం ఆ టీకా కేంద్రాల్లో అవలంభిస్తున్న పద్దతిని చూస్తే తల్లులకు టీకాలు వేస్తున్నా పిల్లలకు మాత్రం రక్షణ లేదనిపిస్తోంది. టీకా కేంద్రాల వద్ద కరోనా నిబంధనలను పాటించకపోగా, కనీసం సామాజిక దూరాన్ని కూడా ఎవ్వరూ పాటించడం లేదు. దానికి తోడుగా టీకా వేయించుకునే ప్రతి మహిళ కూడా తమ పిల్లలను వ్యాక్సిన్ కేంద్రానికి తీసుకురావాల్సి ఉంది. అక్కడ అప్పటికే కరోనా సోకిన మనిషి ఎవరైనా ఉంటే ఆ కరోనా చిన్న పిల్లలకు కూడా సోకే ప్రమాదం లేకపోలేదు. మరి ఈ విషయంలో ప్రభుత్వం ఎటువంటి చర్యలు తీసుకుంటుందో వేచి చూడాలి.
