మోదీ నోరు మెదపరా..?
సాక్షాత్తూ తన కేబినెట్ లో ఓ మంత్రిని పోలీసులు అరెస్ట్ చేస్తే ప్రధాని మోదీ మౌనంగా ఎందుకు ఉన్నట్టు..? పోనీ మోదీ మాట్లాడలేదు, కనీసం అమిత్ షా అయినా స్పందించాలి కదా. ప్రధాని మోదీ ఏర్పాటు చేసిన సమీక్షకు, ముఖ్యమంత్రి మమతా బెనర్జీ కాస్త ఆలస్యంగా వచ్చారని, అలా వచ్చి ఇలా వెళ్లిపోయారంటూ అప్పట్లో బీజేపీ నేతలు తెగ హడావిడి చేశారు. ప్రధానికి ఇచ్చే మర్యాద ఇదేనా అంటూ అమిత్ షా కూడా స్పందించారు. అలాంటిది.. ఇప్పుడు ఏకంగా ఓ కేంద్ర మంత్రిని అరెస్ట్ చేస్తే అసలెందుకు స్పందించలేదు అనేది ఆశ్చర్యంగా మారింది.
శివసేనతో బీజేపీ పొత్తు కోరుకుంటుందనే విషయం వాస్తవం. ఇటీవల దీనికి సంబంధించి మోదీ, ఉద్ధవ్ ఠాక్రే మధ్య చర్చలు కూడా జరిగాయి. అయితే అవన్నీ కేవలం వ్యక్తిగతం అని సీఎం ఉద్ధవ్ కొట్టిపారేసినా, మహారాష్ట్ర ప్రభుత్వంలో లుకలుకలు మొదలవుతాయని, శివసేన, బీజేపీ కలసిపోతాయని అనుకున్నారంతా. ఈ దశలో కేంద్ర మంత్రి, మహా రాష్ట్ర సీఎంపై తీవ్ర వ్యాఖ్యలు చేయడం, వెంటనే ఆయన్ను రాష్ట్ర ప్రభుత్వం అరెస్ట్ చేయించడం, ఆ తర్వాత ఆయన బెయిల్ పై విడుదల కావడం చకచకా జరిగిపోయాయి. దేశవ్యాప్తంగా సంచలనం సృష్టించిన ఈ ఘటనపై ప్రధాని నోరు మెదపకపోవడమే ఇప్పుడు ప్రశ్నార్థకం. మంత్రి వర్గ విస్తరణ సందర్భంగా ఇటీవలే ఏరి కోరి తన కేబినెట్ లోకి తీసుకున్న నారాయణ్ రాణేను పోలీసులు అరెస్ట్ చేయడంపై మోదీ మౌనం దేనికి సంకేతం అని ప్రతిపక్షాలు కూడా ప్రశ్నిస్తున్నాయి. బీజేపీ దీన్ని ఎలా సమర్థించుకుంటుందో చూడాలి.
