ఇప్పుడు అధికార వైఎస్ఆర్ కాంగ్రెస్ పార్టీ ఆయువు పట్టును జనసేన పార్టీ అధినేత పవన్ కల్యాణ్ టార్గెట్ చేశారు. రెండు రోజుల క్రితం రిపబ్లిక్ సినిమా ప్రీరిలీజ్ ఫంక్షన్‌తో మొదలైన మాటల యుద్ధం... ఇప్పుడు తారాస్థాయికి చేరుకుంది. ప్రభుత్వం తీసుకురానున్న ఆన్‌లైన్ టికెటింగ్ విధానాన్ని తప్పుబట్టిన పవన్ కల్యాణ్... అదే వేదికపై మాజీ మంత్రి, వైఎస్ఆర్ కాంగ్రెస్ పార్టీ నేత వైఎస్ వివేకానంద రెడ్డి హత్య కేసును కూడా ప్రస్తావించారు. అసలు కోడి కత్తి కేసు ఏమైందంటూ ప్రశ్నించారు కూడా. వీటితో ఆగకుండా... ఇప్పుడు తాజాగా... ప్రభుత్వ పథకాలను టార్గెట్ చేశారు జనసేనాని. నవరత్నాల వల్ల.. రాష్ట్ర ఆర్థిక పరిస్థితి అత్యంత దారుణంగా తయారైందంటూ లేఖ రాశారు. అసలు మద్య నిషేధం ఏమైందంటూ ప్రశ్నించారు. మద్యం వచ్చే ఆదాయాన్ని గ్యారంటీగా పెట్టి బ్యాంకుల నుంచి రుణాలను తీసుకున్నారని కూడా లేఖలో ప్రస్తావించారు. కరెంట్ ఛార్జీలపై కూడా ఇచ్చిన హామీని పక్కన పెట్టేశారని పవన్ ఆరోపించారు. ఇప్పుడు ఇదే హాట్ టాపిక్.
