దక్షిణ భారతదేశంలో అత్యంత ప్రసిద్ధి చెందిన స్వీట్లలో మైసూర్ పాక్ ఒకటి. ముఖ్యంగా దీపావళికి ఇది చాలా మంది ఇళ్లల్లో తప్పకుండా ఉంటుంది. నెయ్యి, శనగపిండి, పంచదారతో చేసే ఈ స్వీట్ నోట్లో వేసుకుంటే కరిగిపోయేంత మృదువుగా ఉంటుంది. సరైన కొలతలతో, కొద్దిగా ఓపికతో చేస్తే స్వీట్ షాపుల్లో దొరికే గుల్ల మైసూర్ పాక్ రుచిని ఇంట్లోనే పొందవచ్చు.
లడ్డూలు లేకుండా మన పండుగలు అసంపూర్ణంగానే అనిపిస్తాయి. దీపావళికి ముఖ్యంగా బూందీ లడ్డూ, శెనగపిండి (బేసన్) లడ్డూ, రవ్వ లడ్డూ, కొబ్బరి లడ్డూలను ఎక్కువగా తయారుచేస్తారు. తయారుచేయడం సులభం, రుచిలో అద్భుతంగా ఉండే లడ్డూలను నైవేద్యంగా సమర్పించడానికి, బంధుమిత్రులకు పంచడానికి ఉపయోగిస్తారు. బెల్లంతో చేసే లడ్డూలు ఆరోగ్యానికి కూడా మంచివి.
దీపావళికి ఎప్పుడూ ట్రెండింగ్‌లో ఉండే స్వీట్ గులాబ్ జామున్. మృదువైన కోవాతో లేదా రెడీమేడ్ పౌడర్‌తో చేసిన గుండ్రటి జామున్లను నెయ్యిలో వేయించి, సువాసనగల చక్కెర పాకంలో నానబెడతారు. ఇవి చిన్నపిల్లల నుంచి పెద్దల వరకు అందరినీ ఇట్టే ఆకర్షిస్తాయి. వేడివేడిగా తిన్నా, చల్లగా తిన్నా గులాబ్ జామున్ రుచి అమోఘం.
ఆంధ్ర ప్రాంతంలో దీపావళికి మడత కాజా చాలా ఫేమస్. మైదాపిండిని పొరలుగా చేసి, నెయ్యిలో వేయించి చక్కెర పాకంలో నానబెట్టడం వల్ల కాజాలు జ్యూసీగా, పొరలుపొరలుగా తయారవుతాయి. ఇది కూడా దీపావళి రోజున ఇంట్లో చేసుకోవాల్సిన అద్భుతమైన స్వీట్.
క్యారెట్ హల్వా, బాదం హల్వా, గోధుమపిండి హల్వా వంటివి దీపావళికి చేసుకునే సాంప్రదాయ స్వీట్లలో కొన్ని. డ్రై ఫ్రూట్స్, నెయ్యితో చేసే హల్వాలు ప్రత్యేకమైన సువాసన, రుచిని కలిగి ఉంటాయి. ముఖ్యంగా బాదం హల్వాను లక్ష్మీదేవి పూజలో నైవేద్యంగా సమర్పిస్తే మంచిదని నమ్ముతారు. పాయసం, బాదుషా, జిలేబీ, కలాకండ్ వంటి ఇతర రకాల స్వీట్లను కూడా చేసుకుని దీపావళి పండుగను ఆనందంగా జరుపుకోవచ్చు. ఈసారి మీ ఇంట్లో ఈ స్వీట్లను తయారుచేసి, కుటుంబ సభ్యులతో, స్నేహితులతో ఆనందాన్ని పంచుకోండి.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి