ఇంత విపత్తు జరిగినా సరే... సంబంధిత జల వనరుల శాఖ మంత్రి అనిల్ కుమార్ యాదవ్ మాత్రం ఎక్కడా కనిపించలేదు. నెల్లూరు నగర పాలక సంస్థ ఎన్నికల సమయంలో విస్తృతంగా పర్యటించారు అనిల్. నెల్లూరు కార్పొరేషన్ పరిధిలోని అన్ని డివిజన్లను కూడా వైఎస్ఆర్ కాంగ్రెస్ పార్టీ అభ్యర్థులు గెలుచుకున్నారు. ఓ వైపు వర్షాలు కురుస్తున్నా కూడా మంత్రి అనిల్ మాత్రం... నెల్లూరు నగరంలో ఎన్నికల ప్రచారంలో పాల్గొన్నారు. నెల్లూరు నగర పాలక సంస్థపై వైసీపీ జెండా ఎగురవేయడంలో కీలక పాత్ర పోషించారు. కానీ ఫలితాలు వచ్చిన తర్వాత మాత్రం అనిల్ దర్శనాలు లేకుండా పోయాయి. రాష్ట్రంలోని ప్రాజెక్టులు నీటితో పొంగి పొర్లుతున్నాయి. మరోవైపు వరద నీటితో తెగిపోతున్నాయి. కానీ మంత్రిగారు కనిపించడం లేదు. మరో వైపు ముఖ్యమంత్రి ఏరియల్ సర్వే నిర్వహించిన సమయంలో కూడా మంత్రి అనిల్ లేరు. ఇప్పుడు నెల్లూరు జిల్లాను మరోసారి వరద భయం పట్టి పీడిస్తోంది. జిల్లా అధికారులతో కూడా మంత్రి సమీక్షలు నిర్వహించిన దాఖలాలు లేవు.
