చిరంజీవిని కన్నీళ్లు పెట్టించిన వేట:చిరంజీవి ఎప్పటికీ మర్చిపోలేని సినిమా వేట. ఎందుకంటే ఈ సినిమా మెగాస్టార్‌తో కన్నీళ్లు పెట్టించింది. 1986లో వచ్చిన ఈ సినిమాపై చిరంజీవి ఎంతో ఆశలు పెట్టుకున్నాడు. అలెగ్జాండ్రా డుమాస్ అనే ఫ్రెంచ్ నవల ఆధారంగా తెరకెక్కిన ఈ సినిమా కచ్చితంగా హిట్ అవుతుందని చిరు అనుకున్నాడు. దానికోసం ఎంతో కష్టపడ్డాడు. కానీ సినిమా విడుదల అయిన తర్వాత భారీ డిజాస్టర్‌గా నిలిచింది. ఈ పరిణామం చిరంజీవి ఊహించలేదు. భారీ హిట్ అవుతుందని అనుకున్న సినిమా అట్టర్ ప్లాప్ కావడంతో చిరు కన్నీళ్లు పెట్టుకున్నాడట. ఈ విషయాన్ని చిరంజీవి స్వయంగా వెల్లడించాడు. వేట డిజాస్టర్ తరువాత ఇంటికెళ్లి దుప్పటి కప్పుకుని వెక్కి వెక్కి ఏడ్చానని ఆయనే ఓ ఇంటర్వ్యూలో చెప్పాడు.
రెండేళ్లు ఇండస్ట్రీకి దూరం చేసిన సినిమా:చిరు కెరీర్లో ఎన్ని ప్లాప్‌లున్నా ఆయనను ఇండస్ట్రీ నుంచే దాదాపు కనుమురుగు చేసిన సినిమా బిగ్ బాస్. 1995లో వచ్చిన ఈ సినిమా అట్టర్ ప్లాప్ అయిన తరువాత చిరంజీవి దాదాపు రెండేళ్ల పాటు ఇండస్ట్రీలో మళ్లీ కనిపించలేదు. ముఠా మేస్త్రీ, ఎస్పీ పరసురాం వంటి సూపర్ హిట్ చిత్రాల తరువాత బిగ్ బాస్ సినిమా చేశాడు మెగాస్టార్. మాస్ ఎంటర్‌టైనర్‌గా తెరకెక్కిన ఈ చిత్రంపై ఆయన చాలా నమ్మకాలే పెట్టుకున్నాడు. కచ్చితంగా హిట్ అవుతుందని నమ్మాడు. కానీ ఈ సినిమా భారీ డిజాస్టర్‌గా నిలిచింది. అదే సమయంలో మోహన్ బాబు హీరోగా తెరకెక్కిన పెదరాయుడు బ్లాక్ బస్టర్ హిట్‌గా నిలిచింది. దీంతో మెగాస్టార్ దాదాపు 2 ఏళ్లు మళ్లీ సినిమా చేయలేదు. బిగ్ బాస్‌తో పాటే షూటింగ్ చేసిన రిక్షావోడు సినిమా తప్ప 97వరకు మరో సినిమా చేయలేదు. అయితే 97లో మళ్లీ తెరపైకొచ్చిన చిరంజీవి హిట్లర్‌తో మంచి హిట్ అందుకున్నాడు.
