పిల్లల్లో 6 సంవత్సరాల వయసు వచ్చే సరికి 90 శాతం మానసిక ఎదుగుదల ఉంటుందని... అప్పటి నుంచే విద్యాభ్యాసం, వినూత్న ఆలోచనల వైపు అడుగులు పడాలన్నారు. అందుకే పునాది విద్యా, పూర్వ ప్రాధమిక విద్యకు తమ ప్రభుత్వం అధిక ప్రాధాన్యత ఇస్తోందన్నారు. ఇప్పటికే అంగన్ వాడీలను అభివృద్ధి చేసిన సర్కార్.. నాడు-నేడు కింద అన్ని పాఠశాలల రూపురేఖలు మారుస్తున్నామన్నారు. విద్యార్థుల్లో పరిశోధనల దిశగా అడుగులు పడాలన్నారు మంత్రి సురేష్. ఉపాధ్యాయుల్లో ఉన్న అపోహలను తొలగించాల్సిన బాధ్యత అధికారులపై ఉందన్నారు. ప్రభుత్వం ప్రతిపాదించిన కొత్త రకాల పాఠశాలలు పరిచయం చేసే సందర్భంలో ఉపాధ్యాయ పోస్టులకు ఎలాంటి ఇబ్బందులు తలెత్తవన్నారు. పిల్లలు ఇబ్బంది పడతారనే అపోహను కూడా అధికారులే నివృతి చేయాలన్నారు. పాఠశాల్లో మౌలిక వసతుల కల్పనకు, అభివృద్ధికి నాడు - నేడు కింద మొదటి దశకు ఇప్పటికే 3,600 కోట్ల రూపాయలు ఖర్చు చేశామన్నారు. ఆగస్టు 16 నుంచి రెండో దశ పనులను ముఖ్యమంత్రి వైఎస్ జగన్ మోహన్ రెడ్డి లాంఛనంగా ప్రారంభిస్తారన్నారు. అక్షరాల 16 వేల కోట్ల రూపాయలతో పాఠశాలల రూపురేఖలు పూర్తిగా మారుస్తున్నామన్నారు. విద్యార్థులకు నాణ్యమైన విద్య ను అందించే విషయంలో ఉపాధ్యాయులకు అవసరమైన శిక్షణ, అన్ని అవసరాలను తీరుస్తామని మంత్రి భరోసా ఇచ్చారు. సెకండరీ గ్రేడ్ టీచర్ నుండి ఉన్నత స్థాయి అధికారి వరకు వారి పదోన్నతుల ఫై ఎప్పటికప్పుడు చర్యలు తీసుకుంటామని హామీ ఇచ్చారు మంత్రి సురేష్.
