ఆశ్చర్యపోయే విషయం ఏమిటంటే, వర్షాలు కురవక పోయినా.. పంటలు పండక పోయిన మహాత్మా గాంధీజీ ని వారు పూజిస్తారు అట.. ఉదాహరణకు ఆఊరిలో వర్షాలు పడలేదు అని అనుకుందాం.. ఆ ఊరి గ్రామస్తులు ఏం చేస్తారంటే.. గాంధీజీ విగ్రహానికి జలాభిషేకం చేస్తూ ..నిత్యం స్మరిస్తూ దేవుళ్లతో సమానంగా ఆ గ్రామస్తులు పూజిస్తూ వస్తున్నారు.. మహాత్మా గాంధీకి చేసే సేవలు వారికి ఫలితాన్ని ఇస్తున్నాయట. ఇంతకూ ఆ గ్రామం ఎక్కడ ఉంది.. అనే విషయాలను ఇప్పుడు తెలుసుకుందాం..
వివరాల్లోకి వెళితే తెలంగాణ రాష్ట్రం నిజామాబాద్ జిల్లాలోని డిచ్ పల్లి మండలం లో ఉన్న నర్సింగపూర్. ఈ గ్రామంలో సుమారుగా 13 వందల మంది జనాభా ఉన్నారు.. అంతేకాదు ఈ ఊరి గ్రామస్తులు జాతిపిత మహాత్మా గాంధీని గౌరవించడంలో దేశానికి ఆదర్శంగా నిలుస్తున్నారు. నర్సింగపూర్ గ్రామం మధ్యలో 1961 వ సంవత్సరం నవంబరు ఒకటవ తేదీన మహాత్మా గాంధీ విగ్రహాన్ని ఆ వూరి ప్రజలు ప్రతిష్టించారు.. ఆ రోజు నుంచి మహాత్మాగాంధీని ఒక దేవుడిలా పూజిస్తూ, నిత్య పూజలు చేస్తున్నారు.. ఇకపోతే ఆ ఊర్లో ఉండే దేవాలయాల్లో నిత్యం పూజలు జరుగుతాయి లేదో తెలియదు కానీ ,మహాత్మాగాంధీకి మాత్రం తప్పకుండా నిత్య పూజలు జరుగుతాయట.
గాంధీజీ జయంతి ,వర్ధంతి లను మాత్రమే గుర్తుపెట్టుకునే మన దేశ ప్రజలకు .. ఆ ఊరి ప్రజలు ఆదర్శంగా నిలుస్తున్నారు.. ఇంట్లో ఏ శుభకార్యం జరిగినా సరే గాంధీజీ కి పూజలు చేసిన తర్వాతనే ప్రారంభిస్తాం అంటూ నర్సింగపూర్ వాసులు తెలియజేస్తున్నారు.. నాటి తరాల నుంచి వస్తున్న సాంప్రదాయాన్ని తాము కూడా పాటిస్తున్నామని ఆ గ్రామ వాసులు తెలపడం గమనార్హం.
