అయితే.. కొన్నిచోట్ల వాక్సిన్ సీరియస్ అవుతున్న ఘటనలూ వెలుగు చూస్తున్నాయి. ఈ సమయంలో కొన్ని లక్షణాలు ఉన్నవారు టీకా తీసుకోవద్దని టీకాను తయారు చేసిన సంస్థలు చెబుతున్నాయి. కొవిషీల్డ్లో ఉండే పదార్థాల వల్ల గతంలో తీవ్రమైన అలర్జీ లక్షణాలు ఎదుర్కొన్నవారు.. కొవిషీల్డ్ టీకా తీసుకోవద్దని సీరం ఇన్స్టిట్యూట్ ఆఫ్ ఇండియా ప్రకటించింది. ఎల్-హిస్టిడైన్, హైడ్రోక్లోరైడ్ మోనోహైడ్రేట్, మెగ్నీషియం క్లోరైడ్ హెక్సాహైడ్రేట్, పాలీసోర్బేట్ 80, ఇథనాల్, సుక్రోస్, సోడియంక్లోరైడ్, డిసోడియం ఎడిటేట్ డిహైడ్రేట్ తదితర పదార్థాలు కొవిషీల్డ్లో వాడారు.
కొవిషీల్డ్ టీకా వల్ల కలిగే లాభనష్టాలను టీకా తీసుకునే వారికోసం ఈ తయారీ సంస్థలు తమ వెబ్సైట్లో అందుబాటులో ఉంచుతున్నాయి. అంతే కాదు.. టీకా తీసుకునే ముందు గతంలో ఏదైన ఔషధం, ఆహారం, టీకా లేదా కొవిషీల్డ్లో ఉన్న పదార్థాల వల్ల అలర్జీ లక్షణాలు వచ్చి ఉంటే ఆ విషయాన్ని ఆరోగ్య సిబ్బందికి తెలియజేయాలని ఈ సంస్థలు చెబుతున్నాయి. జ్వరం, రక్తస్రావం రుగ్మత, రక్తం పలుచగా ఉండే లక్షణాలు కలిగి ఉంటే టీకా తీసుకునే ముందు చెప్పాలని సీరం సంస్థ తెలిపింది.
వీటితో పాటు.. గర్భంతో ఉన్నా, గర్భం దాల్చే అవకాశం ఉన్నా, పిల్లలకు పాలిచ్చే వారైతే ఆ విషయాన్ని కూడా ముందే వైద్య సిబ్బందికి తెలియజేయాలని సీరం సంస్థ చెబుతోంది. కోవాగ్జిన్ తయారు చేసిన భారత్ బయోటెక్ కూడా ఇలాంటి సూచనలే చేసింది. అందుకే టీకా తీసుకునేవారు ఈ జాగ్రత్తలు తప్పకుండా పాటించాలి మరి.