రాష్ట్రపతి ఎన్నికల్లో ఎన్డీఏ అభ్యర్థి ద్రౌపది ముర్ముకు మద్దతు ఇవ్వాలని ఏపీలోని వైసీపీని తామే కోరామని చెప్పారు కేంద్ర జల వనరుల శాఖ మంత్రి గజేంద్ర సింగ్ షెకావత్. తమ పార్టీ నేతలు ఏపీ సీఎం జగన్ తో నేరుగా ఫోన్ లో మాట్లాడారని, ఆయన వివరణ ఇచ్చారు. రాష్ట్రపతి అభ్యర్థి ఎంపిక తర్వాత, ఎన్డీఏ భాగస్వామ్య పక్షాలతో పాటు, ఇతర అన్ని ముఖ్య పార్టీల నేతలతో మాట్లాడామని ఆయన చెప్పారు. ఆ సందర్భంలోనే వైసీపీని కూడా సంప్రదించామని, మద్దతు కోరామన్నారు గజేంద్ర సింగ్ షెకావత్. అయితే రాష్ట్రపతి ఎన్నికల్లో బీజేపీ ఎవరి మద్దతు కోరలేదని, ముఖ్యంగా వైసీపీ మద్దతు అడగలేదని.. బీజేపీ నేత సత్యకుమార్ అన్నట్టుగా వార్తలొచ్చాయి. ఒకవేళ ఆయన అలా అన్నట్టయితే అది ఆయన వ్యక్తిగత అభిప్రాయం కావొచ్చని చెప్పారు గజేంద్ర సింగ్ షెకావత్. ఆయన ప్రకటనతో బీజేపీకి ఏ మాత్రం సంబంధం లేదని వివరణ ఇచ్చారు షెకావత్.
రాష్ట్రపతి ఎన్నికలో తాము వైసీపీ మద్దతు కోరలేదంటూ సత్యకుమార్ చేసిన వ్యాఖ్యలు అవాస్తవమని, ఆ వ్యాఖ్యలను ఖండించారు కేంద్ర మంత్రి షెకావత్. తామే సంప్రదింపులు జరిపామని, నామినేషన్‌ దాఖలు సమయంలో ఆ పార్టీ నేత విజయసాయిరెడ్డి కూడా హాజరయ్యారని గుర్తు చేశారు. సత్యకుమార్ వ్యాఖ్యలతో ఏపీ రాజకీయ వర్గాల్లో కలకలం రేగింది. వైసీపీని తీసిపారేసినట్టు సత్యకుమార్ మాట్లాడారని అంటున్నారు. అదే సమయంలో బీజేపీకి మద్దతిచ్చే విషయంలో వైసీపీ పునరాలోచించే అవకాశం కూడా ఉంది. అందుకే వెంటనే అధినాయకత్వం రంగంలోకి దిగింది. గజేంద్ర సింగ్ షెకావత్ తో ప్రకటన ఇప్పించింది. రాష్ట్రపతి అభ్యర్థి ఎన్నికల విషయంలో ప్రతి ఓటు కూడా కీలకమే. అందుకే తటస్థ పార్టీలతోపాటు, వైరి వర్గాలను కూడా కేంద్రం ఈ విషయంలో అభ్యర్థించింది. చివరకు తాను అనుకున్నది సాధించింది. ఎన్నికకు ముందే ద్రౌపదీ ముర్ము గెలుపు ఖాయం చేసుకుంది.
క్లిక్ చేసి ఇండియాహెరాల్డ్ వాట్సాప్ చానెల్·ను ఫాలో అవ్వండి